Nationalism

is daur meiN may aur hai jaam aur hai jam aur
saaqi ney binaa ki rawish e lutf o sitam aur
muslim ney bhi ta'amir kiya apna haram aur
tahzeeb key aazar ney tarashwaaye sanam aur
in taza khudaoN meiN baDaa sab sey watan hai
jo payrahan iska hai, woh maz'hab ka kafan hai

yeh buth key tarasheedah e tahzeeb e nawee hai
gharat gar e kaashanah e deen e nabawi hai
baazu tera tawheed ki quwwat sey qawi hai
islam tera des hai tu mustafawi hai
nazzarah e deyreenah zamane ko dikha dey
ay mustafawi! khaak meiN is buth ko milaa dey!

ho qayd e maqami to natijah hai tabahi
rah e bahr mein, azaad e watan, surat e mahi
hai tark e watan sunnat e mahbuub e ilaahi
dey tuu bhi nubuwwat ki sadaqat pey gawahi
guftar e siyasat meiN watan aur hi kuch hai
irshad e nubuwwat meiN watan aur hi kuch hai

aqwam e jahan meiN hai riqabat to isi sey
taskheer hai maqsud e tijarat to isi sey
khali hai sadaqat sey siyasat to isi sey
kamzor ka ghar hota hai ghaarat to isi sey
aqwam meiN makhluq e khuda bat-ti hai is sey
qawmiyyat e islam ki jaD kat-ti hai is sey